Waziri Mahiga akosolewa kutowaweka wazi watanzania juu ya fedha za MCC

Waziri Kivuli wa Mambo ya Nje Mch. Peter Msigwa akiongea na waandishi wa habari juu ya fedha za MCC.

SIKU chache baada ya Serikali ya Marekani kuzuia fedha za msaada kwa ajili ya maendeleo Millennium Challenge Cooperation (MCC), msemaji kambi rasmi ya upinzani Waziri kivuli wa Wizara wa Mambo ya Nje Mch. Peter Msigwa ametoa tamko la kuwataka Jumuiya ya Ulaya nayo kuzuia misaada kwa serikali Tanzania iweze kujitafakari kama imezingatia vigezo vya MCC katika kupata misaada.

Akizungumza na waandishi wa habari leo katika ukumbi wa Hotel ya M. R, Mch. Msigwa ambaye pia ni Mbubge wa Jimbo la Iringa Mjini alisema kambi ya upinzani imesikitishwa na maelezo ya Waziri wa Mambo ya Nje Balozi Agustino Mahiga kutowaeleza wazi watanzania sababu hasa ya serikli ya Marekani kusitisha utolewaji wa fedha hizo za msaada badala yake kukurupuka na kutoa sababu ambazo hazina mashiko kwa wananchi.

Amesema kuwa sababu ambazo Balozi Mahiga alizitoa juzi hazina mashiko kwa kuwa serikali ya Tanzania imekiuka misingi mojawapo inayozingatiwa na MCC katika vigezo 17 katika kuchagua nchi inayostahili kupata msaada na miongoni mwa vigezo vya msingi kabisa ni nchi husika kuwa na dhamira ya dhati ya kuimarisha demokrasia na kuendesha chaguzi zilizo huru na haki.

Amesema kuwa katika taarifa yake MCC ilieleza maeneo ambayo Tanzania imekiuka vigezo kuwa ni marudio ya uchaguzi haramu wa urais Zanzibar na kupitisha Sheria ya Makosa ya Mawasiliano ya Mitandaoni (Cyber Crime) sheria inayonyima uhuru wa wa kujieleza na uhuru wa kujumuika.

"Serikali ya Tanzania haijachukua hatua za kuhakikisha kuheshimiwa kwa uhuru wa kujieleza na uhuru wa kujumuika katika utekelezwaji wa sheria ya Uhalifu wa Mtandao , Tanzania iliendelea na uchaguzi wa marudio Zanzibar ambao haukushirikisha wote na wala haukuakisi maoni ya wote, licha ya malalamiko kutoka kwa serikali ya Marekani na jamii ya kimataifa”, amesema

Mchungaji Msigwa amesema kuwa kwa mantiki hiyo ni dhahiri kuwa Tanzania haikupaswa kushitushwa na uamuzi wa MCC kwa kuwa Serikali ilivifahamu vizuri na mapema vigezo vya kustahili kupewa misaada na MCC.

Aliongeza kuwa inashangaza na kusikitisha kuona Msomi na Mwanadiplomasia mzoefu kama Balozi Mahiga akilitia Taifa Aibu ya Mwaka kwa kulalamikia kuonewa na kutoa kauli za “hovyo” kama alivyozitoa.

Ameeleza kuwa kauli ya Waziri Mahiga, za kukataa kukiri makosa yaliyo dhahiri yaliyofanywa na Serikali na Chama Chake (CCM) zinaweza kabisa kuuweka rehani uhusiano na ushirikiano mzuri wa kidiplomasia ambao Tanzania imekuwa ikiupata kutoka kwa nchi mbalimbali na mashirika ya kimataifa kama MCC.

“Tukiweka mbele maslahi ya nchi hii yakiwemo ya kudumisha mahusiano mazuri ya kimaendeleo na nchi nyingine, Kambi rasmi ya Upinzani tunaiomba MCC, Marekani na mataifa mengine kuzipuuza kauli za hovyo zilizotolewa na Waziri Mahiga, kwani haziakisi ustaarabu wa Watanzania” amesema Mchungaji Msigwa.

Mchungaji Migwa ametaja sababu nyingine kuwa, Tanzania si mbia mgeni kwa MCC na kusema kuwa Tanzania ilishapokea awamu ya kwanza ya fedha za msaada kutoka MCC ambazo zilikuwa ni Dola za Marekani milioni 698. Fedha hizi zilitumika kwa ajili ya ujenzi wa barabara za Tunduma- Sumbawanga, Tanga-Horohoro na Namtumbo-Songea-Mbinga.

Aidha amesema kuwa fedha hizo zilitumika pia kujenga upya mfumo wa huduma za maji kwa ajili ya miji ya Dar es Salaam na Morogoro na kusambaza umeme katika vijiji vya mikoa 10 ya Tanzania Bara na nyingine  zilitumika kutandaza njia ya pili ya kusafirisha umeme chini ya Bahari ya Hindi kati ya Bara na Tanzania Visiwani na kujenga barabara zote kuu za Kisiwa cha Pemba na baadhi ya barabara za Unguja kwa kiwango cha lami.

Pia amesema kuwa kwa namna yoyote ile isingewezekana kwa MCC walewale kuionea Tanzania ile ile waliyoisaidia katika awamu ya kwanza ya misaada yao na kwamba ni dhahiri kuwa Nchi imepoteza sifa kwasababu zilizoelezwa – na kimsingi sababu zenyewe ni uchu na ulevi wa madaraka uliopitiliza unaofanywa na Chama Cha Mapinduzi (CCM) na Serikali yake. 

Amesema hatua ya MCC kusitisha uhusiano na Tanzania ni ushahidi tosha kuwa hujuma za uchaguzi na ukiukwaji mkubwa wa demokrasia na utawala bora, unaofanywa na serikali ya CCM na ambao Wapinzani wamekuwa wakiulalamikia mara kwa mara sasa umefikia hatua mbaya zaidi kiasi cha kugusa hisia za jumuiya ya kimataifa.

“Ni mtazamo wangu kuwa MCC na jumuiya ya kimataifa bado walichelewa sana kugundua “udhalimu” wa Serikali ya CCM, ambayo karibu mara zote imekuwa ikihujumu haki na uhuru wa watu kwenye chaguzi, na si kwa upande wa Zanzibar tu, bali pia na uchaguzi wa Jamhuri ya Muungano. Sheria kandamizi zilizopo Tanzania si hiyo ya Cyber Crime tu. Tume ya Jaji Francis Nyalali ilibainisha Sheria nyingi kandamizi na kushauri zifanyiwe mapitio ya kuziboresha lakini hadi leo serikali isiyo ya kidemokrasia ya CCM imeendelea kuzidumisha sheria hizo na kuongeza nyingine kama hii ya Cyber Crime. Natoa rai kwa jumuiya ya kimataifa kutokukubali kurubuniwa tena na serikali ya CCM na badala yake ishirikiane kwa karibu na Watanzania wote wazalendo katika kuboresha misingi ya utawala bora na demokrasia kwenye nchi hii” amesema.

Pia alieleza sababu nyingine kuwa, mabalozi wa nchi mbalimbali washirika wa maendeleo ikiwemo Marekani, walishatoa rai zaidi ya mara moja wakiionya na kuishauri Serikali ya Rais Kikwete na baadaye Rais Magufuli kuchukua hatua za kuutatua mgogoro wa uchaguzi wa Zanzibar na kwamba walishauri mara kadhaa kuwa uchaguzi wa marudio usingeweza kuwa suluhu halali ya kumaliza tatizo la Zanzibar na badala ya kuchukua hatua hasa za kukisihi Chama chake kuheshimu maamuzi halali ya wapiga kura wa Zanzibar yaliyofanywa Oktoba 25 mwaka jana na hivyo Rais wa Jamhuri ya Muungano, John Magufuli, alipuuza rai zote hizo.

“Mbali na Mabalozi hao, hata aliyekuwa Waziri wa Mambo Nje wa Serikali ya Awamu ya Nne, Bernard Membe, alionya na kutoa tahadhari kuhusu suala la Zanzibar lilivyokuwa likichukuliwa kwa mzaha-mzaha, badala ya kutatuliwa kwa umakini na matokeo yake ndiyo haya ya kutengwa na MCC” amesema.

Msigwa alionesha masikitiko yake kuwa Balozi Mahiga anaingiza ukachero kwenye mambo ya msingi badala ya kuwaeleza watanzania ukweli wa Marekani kusitisha fedha za MCC.

“Kwa asiyemjua Balozi Mahiga ni kachero mzoefu wa siku nyingi tangu utawala wa Nyerere. Tunamtaka awaambie watanzania mambo ya msingi siyo kuingiza ukachero. Tena aache mara moja.

“Serikali ya Tanzania ina imeweka watu wengine kama hawana maana na kutumiwa vibaya. Haki za binadamu, watu wanateswa na kunyanyaswa lakini Mahiga hayaoni na kuyasemea hayo na badala yake anawahadaa watanzania” amesema.

Aidha alisema kuwa, wakati wa ubaguzi wa rangi Afrika Kusini, Tanzania ilikuwa ya kwanza kuhamasisha nchi za kimataifa kuweka vikwazo kwa sababu haki za binadamu zilikiukwa tena kwa makusudi lakini cha kushangaza Tanzania hii hii imeingia katika ukiukaji wa haki za binadamu.

“Tunasikitishwa sana kwa kachero huyu kupotosha wananchi. Ni wakati mwafaka wa Dkt. Mohamed Shein na Rais wa Jamhuri ya Muungano wa Tanzania Dkt. John Magufuli kukaa meza moja na kujitafakari.

“Kwa bahati mbaya nchi hii inaongozwa kwa mwangwi. Watanzania wameaminishwa kuwa wamekusanya tunakusanya mapato mengi sana! Serikali haijakataa fedha za MCC ila wanapotosha umma kwa kutoa sababu za uongo. Tena watanzania wajue kuwa serikali haina uwezo wa kujitegemea” amesema.