Open University Iringa watoa msaada kwa waishio na VVU

Mkurugenzi wa Chuo Kikuu Huria cha Tanzania kituo cha Iringa (aliyeshika chupa) na walezi wa Clab ya chuo hicho (Open University HIV/AIDS Club) wakimkabidhi Mkurugenzi wa Kituo cha Alamano Sr. Rosela msaada wa vyakula kwa ajili ya kuwasaidia wanaoishi na VVU.

JAMII inapaswa kutambua na kujitoa katika kuwahudumia wanaoishi na VVU na kuwajali kwa kila namna ili waweze kuishi muda mrefu wakihudumia familia zao.

Haya yamezungumzwa leo na Mkurugenzi wa Chuo Kikuu Huria kituo cha Iringa Mch. Dkt. Lechion Peter Kimilike alipokuwa akikabidhi msaada wa vyakula kwa ajili ya kuwasaidia wanaoishi na VVU katika kituo cha Allamano kilichopo katika Manispaa ya Iringa.

Amesema kazi ya kuwahudumia waishio na VVU ni ya jamii nzima kwani hali hii inaweza kumtokea mtu yoyote na kwamba jamii isiwabague, kuwatenga au kuwafanyia vitendo vya kikatili wanaoishi na maambukizi bali iwafariji na kuwajali kwa kila jambo ili wasikate tama ya kuishi.

“Kazi hii ni yetu sote. Jamii inapaswa kutambua kuwa kuwafanyia vitendo vya ukatili watu kama hao ni dhambi na ni kosa kisheria.

“Ni dhamna potofu kuwafanyia vitendo vya ukatili watu kama hawa. Jamii iwe na uelewa wa kutosha” amesema Kimilike.

Dkt. Kimilike pia ameitaka jamii kutambua kuwa kuzaa mtoto mwenye ulemavu wa ngozi si dhambi bali ni kiumbe kama walivyo wengine ambaye anapaswa kuishi na kupata mahitaji kama wapatayo wengine.

“Kuua albino ni wazo potofu na ni baya sana. Imani hii haikubaliwi wala haiwezi kuungwa mkono na mtu yeyote. Kuwaua watu kama hawa ni kutenda dhambi tu kwani hawa ni watu kama tulivyo wengine ambao wanapaswa kupewa haki zote” amesema.

Pia ameiasa jamii kutoa ushirikiano wa dhati katika kukemia vitendo vya ukatili na kuwafichua wale wote wanaojihusisha na vitendo hivyo ili waweze kuwajibishwa kisheria.

Akipokea msaada huo kituoni hapo, Mrabu wa kituo hicho Christopher Kunzugala amesema elimu kwa jamii bado inahitajika katika kuwahudumia na kuishi na watu wanaoishi na VVU.

Kunzugala amesema kituo kinakabiliwa na changamoto nyingi ikiwemo ya ukosefu wa fedha za kukiendesha na hivyo kuiomba jamii kwa wale wanaoguswa kujitoa kwa ajili ya kusaidia kazi ya huduma kwa wale ambao wananishi na VVU.

Amebainisha changamoto nyingine ni wateja wenyewe kutozingatia kwa dhati maelekezo ya wataalamu na kusababisha maambukizi mapya jambo linalosababisha utoaji huduma kuwa mgumu.

“Wateja wengi tunaowahudumia ni akina mama. Akina baba hawajitokezi kwa wingi kupima au kupata ushauri.

“Nafikiri elimu bado inahitajika kuielimisha jamii ili watu waweze kujitokeza kupima na kupata huduma kuliko kuogopa na kuishi kwa hofu” amesema Kunzugala.

Club ya HIV/AIDS ya Chuo Kikuu Huria cha Tanzania kituo cha Iringa walitoa msaada wa mafuta ya kula, sukari, chumvi na unga wa sembe ikiwa ni mwendelezo wa msaada waliotoa juzi katika kituo cha Huduma ya Mtoto kilichopo Ilula Wilaya ya Kilolo katika Mkoa wa Iringa wenye thamni ya zaidi ya shilingi 1,000,000/=.