Hospitali ya Rufaa Iringa yakabiliwa na uhaba wa damu

UPATIKANAJI wa damu katika hospitali ya rufaa ya Iringa pamoja na hospitali za wilaya ni tete kutokana na benki ya damu kuishiwa damu.

Haya yamezungumzwa na mteknolojia wa maabara Mkoa wa Iringa Mlike Mwalongo alipotakuwa akihojiwa na waandishi wa habari ofisini kwake leo juu ya upatikanaji wa damu.

Mwalongo amesema hali ya upatikanaji wa damu ni tete na kwamba hospitali ya rufaa Iringa pekee inahitaji wastaniwa  wa unit 210 kwa mwezi ambapo ni sawa na lita 105 kwa mwezi.

Amesema uhaba wa damu unatokana na kukosa vitenganishi (vitendea kazi) ambavyo vingewasaidia wataalam wa damu kufika maeno mbalimbali kwa ajili ya kuwaomba wananchi kuchangia.

Ametaja sababu nyingine kuwa ni hali ya uchumi ambapo awali walikuwa wakitegemea wafadhili katika ukusanyaji wa damu kwa wanaochangia lakini kwa wakati huu wamekosa ufadhili na kusababisha damu kutopatikana kiurahisi.

“Hali ya upatikanaji wa damu kwa wakati huu ni tete. Damu haitolewi sehemu moja ila watu wanatembea sehemu mbalimbali kwa ajili ya kwenda kuomba na kutoa damu kwa watu mbalimbali wanaoguswa na kuchangia.

“Pia tuna uhaba wa dawa za kupimia damu. Kwa kuwa upatikanaji wa damu ni tete, tunatumia mbadala kupata damu ili kumuokoa mgonjwa kwa kuwaomba ndugu wa mgonjwa achangie mgonjwa wake vinginevyo hatuna jinsi” amesema Mwalongo.

Anabainisha kuwa tatizo la damu linaloikumba hospitali ya rufaa Iringa ni tatizo la kanda nzima ya nyanda za juu kusini inayojumuisha mikoa sita ya Iringa, Njombe, Mbeya, Ruvuma, Katavi na Rukwa.

Kwa mujibu wa Mwalongo hospitali ya rufaa Iringa hutumia unit 6 hadi 7 kwa siku ambapo ni sawa na kutumia lita 3.5 kwa siku.

Naye ofisa viwango vya maabara Mkoa wa Iringa Emmy Mkupasi amesema elimu bado inahitajika kwa jamii juu ya uchangiaji damu kwani kumekuwa na mpishano wa uelewa juu ya kuwapo na benki ya damu.

“Kumekuwa na lugha gongana tangu walipotangaza kuanzishwa benki ya damu kitaifa. Watu wanadhani kuwa serikali inatengeneza damu na hivyo kufikiri kuwa damu itakuwepo tu kumbe wasijue kuwa damu yenyewe ni ya wananchi wenyewe ambao wanaombwa kuchangia.

“Cha msingi tuwaombe wananchi wahamasike kuchangia damu kwani hatuwezi kujua ni nani atatumia kwa sababu anaweza akaja ndugu yako au mtoto au yeyote yule wa karibu akaja kutumia. Inapokosekana damu tutaanza kulaumiana kuwa damu haipo na sisi hatuna namna yeyote kwamba tungetengeneza damu. Damu ni yenu na ni yetu sote, tuchangie kwa moyo mweupe” amesema Mkupasi.

Ameeleza kuwa imebainika kuwa wanaochangia damu kwa kiasi kikubwa kwa Iringa ni wanafunzi wa shule na wa vyuo na kwamba pale inapotokea shule na vyuo vimefungwa uchangiaji wa damu unapungua kwa asilimia kubwa.

Hata hivyo amewataka wananchi kuondoa dhana ya uchangiaji wa damu kuwa ni watu fulani kwani kila mtu anaguswa na pale anapofika kwa ajili ya kuchangia hupewa elimu kabla ya kutolewa damu.

“Kwa upande wa uchangiaji wa damu haubagui mtu, awe ni kiongozi wa dini au mwanasiasa wote suala hili linatugusa. Tuhamasike na kuhamasishana ili tuweze kupata damu ya kutosha.

“Lakini pia elimu bado inahitajika juu ya uchangiaji wa damu kwani bado haijawafikia wananchi kiwango cha kutosha. Wanaoelewa sana ni wanafunzi kwa sababu ndio wanaojitokeza mara kwa mara kuchangia. Tungependa wananchi wote wahamasike ifike siku moja tukasema sasa inatosha kwa sababu watu wanakuwa wamejitokeza kwa wingi" amesema.

Mkupasi pia amewataka wanahabari kuwa mfano wa kuigwa na jamii kujitokeza kuchangia damu ili wananchi wapate hamasa zaidi kwani hali ilivyo sasa ni tete kupita kiasi.

Kutokana na changamoto ya kukosa damu, wahudumu wa afya wamekuwa wakishutumiwa bila sababu kuwa wanazuia damu jambo ambalo limekuwa halina ukweli wa kutosha.

Iliwawia vigumu madaktari nahudumu wa afya katika hospitali ya Wilaya ya Mufindi iliyopo Mafinga pamoja na hospitali ya rufaa Iringa wakati ilipotokea ajali iliyoua watu 50 katika maeneo ya Changarawe kule Mafinga wiki lililopita kwa majeruhi waliotakiwa kuongezwa damu kwani hakukuwa na damu kulinganisha na mahitaji ya watu.

Watu mbalimbali pia wamekuwa na mtizamo wao kuwa tatizo kubwa la ukosefu wa damu katika hospitali ni ukosefu wa elimu endelevu kwa umma.

Njowole Musa mkazi wa Iringa mjini ameliambia mtandao huu kuwa wananchi hawana elimu juu ya uchangiaji wa damu na kwamba ingekuwa ni elimu endelevu ili wananchi waelewe kuwa jukumu la upatikanaji wa damu katika hospitali mbalimbali ni la wananchi wenyewe.

“Mimi mwenyewe sielewi lolote juu ya uchangiaji wa damu lakini wataalamu wetu wangekuwa na utaratibu wa kutoa elimu kwetu wananchi na ikawa elimu endelevu, sidhani kama leo hii tungezungumzia suala la uhaba wa damu.

“Au serikali ingeangalia utaratibu wa utoaji elimu kwa umma juu ya jambo hili tungekuwa mbali mno. Kama pesa ya kupita kwa wananchi kutolea elimu haipo, serikali ifanye utaratibu wa wale mafisadi wanaotuibia kodi zetu warudishe tufanyie masuala ya msingi na ya muhimu kama haya. Tatizo ni elimu tu” amesema.