BAADHI YA WAAJIRI WANAWANYANYASA WAFANYAKAZI WANAPOJIUNGA NA VYAMA VYAO

BAADHI ya waajiri wanalalamikiwa kuwanyanyasa wafanyakazi wao pindi wanapojiunga na vyama vya wafanyakazi ili kuwakatisha moyo wa kutafuta haki zao.

Haya yamezungumzwa na Mohamed Sadick alipokuwa akifungua Mkutano Mkuu wa Kanda wa Chama cha Wafanyakazi wa Migodi, Nishati, Ujenzi na Kazi zingine (TAMICO) uliofanyika katika ukumbi wa jengo la shirikisho la vyama vya wafanyakazi Mkoa wa Iringa.

Sadick amesema kazi ya vyama vya wafanyakazi si ndogo kwa kuwa hufanya kazi zaidi ya vyama vya siasa kwa kudai haki ya kweli kwa ajili ya wafanyakazi katika sekta mbalimbali bila kujali idikadi na bila ubaguzi wowote.

Amesema pamoja na kuwa wafanyakazi wana haki mbalimbali kazini, wapo baadhi ya waajiri ambao huwatishia wafanyakazi wao pale wanapojiunga na vyama vya wafanyakazi wakitaka kuwakatisha tamaa ya kudai haki zao ili waendelee kunyonywa.

Amewataka viongozi wa vyama vya wafanyakazi kuwa na msimamo wa dhati na kutokubali kubadilika kutokana na magumu wanayokutana nayo wawapo katika harakati za kudai na kusimamia haki za wafanyakazi wao.

“Viongozi wa vyama vya wafanyakazi msifanye kazi kwa kutaka kusifiwa. Fanyeni kazi kwa kujituma kwa kutafuta haki za wafanyakazi.

“Kiongozi lazima astahimili kwa sifa zote ama kwa kusifiwa ama kutosifiwa na pia astahimili hali zote anazokutana nazo kwa waajiri pale anapokuwa akiwajibika kikazi kwa ajili ya haki za wafanyakazi” amesema Sadick.

Mzee Sadick ambaye aliwahi kuwa katibu wa chama hicho cha wafanyakazi ambaye pia ni mstaafu amesema kiongozi anayependa rushwa kutoka kwa mwajiri, anawaangamiza wafanyakazi waliompa dhamana ya kuwa msemaji wao na kwamba kiongozi wa namna hiyo hafai.

Akisoma taarifa ya chama hicho kwa niaba ya Katibu wa chama hicho Juma Bwikitila amesema moja ya changamoto kwa vyama vya wafanyakazi ni kuongozwa na viongozi wasio na uwezo.

Bwikitila amesema kuwa viongozi wakikosa uwezo baadhi ya waajiri wanatumia udhaifu huo kuwafukuza wafanyakazi wao wanapojiunga na vyama vya wafanyakazi.

Mkutano huo ulikwenda sambamba na uchaguzi wa viongozi mbalimbali wa chama hicho ambapo Denis Daniel Malawa kutoka sekta ya barabara Mkoa wa Iringa amechaguliwa kuwa Mwenyekiti wa Wilaya huku wajumbe wa Mkutano Mkuu wa Kanda wakiwa Mercy Chindongo kutoka sekta ya ujenzi, Joyce Lyatuu – kazi nyingine wakati sekta ya migodi na nishati zikiachwa wazi hadi hapo watakapopata wawakilishi kutokana na kukosa wajumbe kwenye mkutano huo.

Kamati ya utendaji Wilaya viongozi waliochaguliwa ni Daniel Panjinga Msalilwa (ujenzi), Shabani Omary Mtunguja (shirika la nyumba), Sheila Mwinyimkuu Mwinyiheri (sekta ya barabara Njombe), Subira Anyesile Maikema huku sekta za migodi na nishati zikiachwa wazi.

Kamati ya wanawake viongozia waliochaguliwa ni Rose Wales Makoti kutoka Songea akichaguliwa kuwa Mwenyekiti na Felista Adelgori Banda kutoka sekta ya barabara Mkoa wa Iringa akichaguliwa kuwa Katibu.

Waliochaguliwa kuwa wajumbe wa kamati ya wanawake ni Julieth James na Dynes Panjinga Msalilwa huku Ibrahimu Mianzi, Elida Joseph Ngunguru na Mukakalo Charles Mukakalo wakichaguliwa kuwa kamati ya vijana.

Wajumbe wa wanne wa Mkutano Mkuu waliochaguliwa ni Edesius Silvanus Kangole, Omary Said Chitawala, Mercy Stanlay Chindongo na jila na nne linasubiriwa kupatikana kutoka sekta ya migoti.

TAMICO ni miongoni mwa shirikisho la vyama vya wafanyakazi Tanzania chini ya mwavuli wa TUCTA.