Wananchi wa Ndolezi waingiwa hofu ya kuvamiwa na simba

WANANCHI wa Mufindi katika Mkoa Iringa wapo katika taharuki kubwa na hofu ya kuvamiwa na simba kutokana na wanayama hao kupita katika maeneo mengi katika makazi yao.

Haya yamezungumzwa leo na mwenyekiti wa Kijiji cha Ndolezi Kata ya Boma katika wilaya ya Mundi, Clement Nditu alipokukuwa akiongea na mtandao huu juu ya taharuki inayokikumba kijiji chake.

Nditu amesema wanakijiji waligundua kuwa wapo hatarini walipokuwa wakienda mashambani mwao na kuona nyayo za mnayama wasiyemfahamu jambo lililowalazimu kutoa taarifa kwa uongozi wa kijiji ili hatua za kiusalama zifuate.

Maelezo ya mwenyekiti wa kijiji hicho yanakuja baada ya kuwapo kwa taarifa kuwa kijiji cha Ndolezi kimevamiwa na simba japo kuwa haikuelezwa kama kuna madhara yoyote kwa wananchi.

Mtandao huu umemtafuta ofisa mtendaji wa kijiji hicho Yohana Kikungwe ili aweze kutoa ufafanuzi zaidi ambapo amesema kijiji hicho na maeneo jirani katika Kata hiyo wapo katika sintofahamu ya hatima ya wanayama hao.

Taharuki hiyo ilianza Jumamosi 14, Machi mwaka huu katika kijiji cha Luganga kinachopakana na Kata ya Ifwagi baada ya wananchi kubaini kuwa huenda wameingiliwa na wanyama wakali katika maeneo yao baada ya kuona nyayo.

“Tangu Jumamosi iliyopita katika maeneo ya Luganga tulipata taarifa kwa wananchi kuwa wanaona nyayo ambazo si za kawaida na kututaka kufanya uchunguzi. Lakini kwa kuwa mimi si mtaalamu wa wanyama, niliwasiliana na wataalamu wa wanyama pori ili waweze kufika kutusaidia.

“Wataalamu wa wanayama pori walikuja na kutujulisha kuwa ni nyayo za simba ambapo walipiga kambi siku tatu wakiwafuatilia lakini hawakuwaona ikabidi waondoke na kuwaomba wananchi watakapowaona sehemu yoyote watoe taarifa” amesema Kikungwe.

Hata hivyo taarifa zinaeleza kuwa siku ya juzi wanyama hao walionekana katika kijiji cha Kibao.

Katika hatua nyingine taarifa zilizotufikia jana asubuhi zilieleza kuwa wanyama hao walionekana katika maeneo ya soko la Mafinga na kusambazwa kwa taarifa sehemu  mbalimbali kwa wananchi ili waweze kuwa na tahadhari.

Mtandao huu ulipomtafuta ofisa maliasili na Mazingira wa Wilaya Jeswald Ubisimbali alikiri kulifahamu jambo hilo na kwamba wataalamu wamekwenda kwa ajili ya kufanya uchunguzi katika maeneo hayo.

Ubisimbali alisema bado wanaendelea na msako wa wanyama hao na kwamba wananchi wanapaswa kutoa taarifa za haraka pindi wanapowaona wanyama hao sehemu yoyote ili waweze kudhibitiwa kabla hawaleta madhara.

“Nimelisikia na ninalifahamu suala la simba kuvamia maeneo ya makazi ya watu. Katika maeneo ya Luganga na leo asubuhi tumesikia ni Mafinga sokoni, tukafika hapo sokoni tukahojiana na wananchi na tukawaambia kama watawaona popote watutaarifu japo kuwa wataalamu wetu wameingia porini kuwatafuta.

“Tunawaomba wananchi wakae katika hali ya tahadhari kwa sababu hawa simba hawajapatikana kwa hiyo wanaweza kufika au kuonekana tena sehemu nyingine kwa sababu wanatembea na kuhama hama. Tusaidiane kwa hili ili wasilete madhara. Wasijisahau kwa kuwa wataalamu wetu wapo huko kuwatafuta kwani hawa wananyama wanatembea” amesema.

Tangu kupatikana kwa taarifa za kuwapo kwa wanyama hao wakali, haijaripotiwa taarifa yoyote ya madhara yanayotokana na wanayama hao na hali ya taharuki kwa wananchi bado inaendelea kwa kuwa wanayama hao wanaendelea kuonekan sehemu mbalimbali.