VIJANA WAONYWA KUTOKUJIINGIZA KATIKA UFISADI

Jaji Mstaafu Raymond Mwaikasu

VIJANA Wakristo Wakatoliki wametakiwa kutokujiingiza katika vitendo vya ufisadi na badala yake wametakiwa kutumia uhuru waliopewa na Mungu ipasavyo bila kuwakwaza wengine na kwamba viongozi wanaoshindwa kutekeleza majukumu katika haki ni wasaliti wasiowatakia mema wengine.

Haya yamezungumzwa na Jaji Mstaafu Raymond Mwaikasu alipokuwa akiwahutubia vijana wakati wa sherehe za mzimamizi wao Mt. Yohane Bosco zilizofanyika katika ukumbi wa Don Bosco Parokia ya Mkwawa Jimbo lringa.

Jaji Mwaikasu amesema ufisadi umekuwa ni tatizo kubwa katika serikali ya Tanzania na kwamba unasababishwa na watu wasiyo na huruma, wabinafsi, wasiomuogopa Mungu kuwa waroho kupindukia.

Amewataka vijana kutotumia utashi wao vibaya pamoja na kutotumia uhuru wao kutenda maovu.

“Tambueni kwamba hapa duniani kuna mvuto wa aina mbili, mvuto wa shetani na mvuto wa Mungu. Msifuate mkumbo. Utashi wenu mkiutumia vibaya utawaingiza pabaya” amesema jaji Mwaikasu.

Amesema licha ya kuwa binadamu anatofautiana na wanayama wengine, tofauti hiyo itimike katika kutenda mema na kupiga vita ukatili, ubaguzi, chuki, unyanyasaji na dhuruma.

Pia amesema binadamu anadaiwa kutenda matendo mema kwa wengine na kuwa chachu ya amani, umoja na mshikamano ili kuwezesha wengine kuishi katika furaha.

Amesema kukosa maadili ni kusababisha vitendo vichafu kama wizi, ujambazi na kujiingiza katika vikundi viovu kama “panya road” na kwamba mafundisho ya Mungu ni chachu ya mahusiano mema na wengine.

“Pigeni vita wizi wa mali ya umma, dhuruma, ubadhilifu, vitendo vya utoaji mimba, ujambazi, udanganyifu, hila, udini na ukabila, rushwa, ukatili na uonezi wa haki.

“Jengeni mahusiano mazuri ili tuweze kutoa haki pale penye unyanyasaji. Jiungeni na wenye taaluma ili muwe watendaji wazuri. Zingatieni umuhimu wa maisha yenu ya kiroho” amesema.

Kumbukumbu ya msimamizi wa vijana Mt. Yohane Bosco hufanyika Januari 31 ya kila mwaka.