Kesi ya mauaji ya Mwangosi yazidi kuunguruma katika Mahakama Kuu Iringa

KESI ya mtuhumiwa wa mauaji ya aliyekuwa mwandishi wa habari wa kituo cha runinga cha Channel Ten Daud Mwangosi inayomkabili Pasificus Cleophace Simon imeendelea kusikilizwa leo katika Mahakama Kuu kanda ya Iringa ambapo mashahidi wawili upande wa Jamhuri waliweza kutoa ushahidi wakiongozwa na wawendesha mashtaka wa serikali Sunday na Ladslaus Komanya.

Akitoa ushahidi mbele ya Jaji Paul Kihwelo shahidi namba tatu ambaye ni hakimu katika mahakama ya Mwanzo Dodoma mjini Flora Mhelela ameieleza mahakama kuwa Pasificus alifika ofisini kwake wakati alipokuwa hakimu katika mahakama ya mwanzo ya Bomani iliyopo Iringa mjini kwa ajili ya maungamo juu ya kesi inayomkabili.

Ameiambia mahakama kuwa mnamo Septemba 05, 2012 mtuhumiwa kwa kuongozwa na askari ambaye hakumkumbuka jina, alifika ofisini kwake kwa ajili ya maungamo juu ya kesi inayomkabili ambapo ulikuwa ni muda wa saa 07:24 mchana.

Amesema baada ya kupata taratibu zinazotakiwa kufuatwa wakati wa utoaji maelezo mtuhumiwa alikiri kuwa amehiari mwenyewe kutoa maelezo ambapo baada ya kukaguliwa katika mwili wake alikutwa na kidonda kibichi kidoleni pamoja na majeraha makavu.

“Mtuhumiwa aliniambia kwamba mnamo Septemba 2, 2012 ilitokea kazi ambayo alipangiwa kwenda Nyololo ambako kulikuwa na wanachama wa Chama cha Demokrasia na Maendeleo (Chadema) walikwenda kufanya mkutano.

“Aliendelea kusema kuwa kama ilivyo kawaida kwa ajili ya ulinzi na usalama, kwamba hawakutakiwa kufanya mkutano huo kwa kuwa haukuwa rasmi. Mkutano ulikuwa unazuiliwa kwa sababu kulikuwa na tukio la sensa” ameeleza shahidi namba tatu.

Amesema kuwa, kwa mjibu wa maelezo ya mtuhumiwa baada ya kufika katika eneo la tukio walikuta watu wengi wafuasi wa Chadema wamekusanyika ambapo walitoa ilani mara tatu kuwa hawaruhusiwi kufanya mkutano na watu hawakutawanyika.

Amesema baada ya kuona watu hawatawanyiki ilitolewa amri kuwakamata viongozi wa Chadema ambapo pia waliamrishwa kufyatua mabomu ya moshi ili watu waweze kusambaratika.

“Akasema, wakati wa kutumia mabomu, ndipo aliposikia sauti ya askari ambaye hakumfahamu jina lake akiomba msaada ndipo aliposikia mshindo mkubwa lakini hakujua unatoka wapi lakini akashtuka kuwa huenda ni yeye amelipua bila kujua.

“Alisema baadaye walifolenishwa wakagundua kuwa silaha aliyokuwa amebeba yeye ilikuwa “wrong ranger” bomu halikuwemo ndipo wakagundua kuwa ndilo lililomuua mwandishi wa habari Daud Mwangosi japo kuwa yeye alisema hakukusudia” amesema shahidi huyo.

Kwa upande wake shahidi namba nne mwenye namba G 3212 Lewis Obadia Teikya ambaye ni dereva wa kikosi cha oparesheni katika jeshi la Polisi, amesema kuwa wakati tukio la kuuawa kwa Daud Mwangosi yeye alikuwa mtunza ghala la silaha.

Ametoa maelezo mahakamani hapo mbele ya Jaji Kihwelo Teikya alisema mnamo Septemba 2, 2012 alipigiwa simu na mkuu wa kikosi cha kutuliza ghasia saa 12:30 asubuhi kuwa awahi katika ghala la silaha kwa kuwa imetokea dharula katika Wilaya ya Mufindi kijiji cha Nyololo ili akawakabidhi sialaha askari.

Amesema mingoni mwa askari waliokwenda kuchukua silaha asubuhi ya tarehe hiyo ni pamoja na Pasificus Cleophace Simon ambaye anatuhumiwa kwa mauaji ya Mwangosi na kwamba silaha aliyochukua ni namba 040824 ya mlipuko mkubwa ambayo alichukua saa moja asubuhi ya tarehe 02 na kuirudisha Septemba 3, 2012 saa 9:15 usiku.

“Wakati natoa silaha nilitoa mabomu ya mshindo mkubwa 15, mabomu ya moshi wa kuwasha 22, risasi sa SMG 60, risasi za CSS 8 na mabomu ya kutupwa kwa mkono sikumbuki idadi yake.

“Mabomu yote ambayo niliwapatia hayakurudi ambapo kwa maana nyingine yalitumika wala hakuna hata askari mmoja aliyerudisha bomu lolote” alisema shahidi namba nne.

Shahidi huyo ameendelea kusema kuwa wakati matukio hayo yakifanyika kulikuwepo na viongozi wao wa juu ambapo Kamanda wa polisi Mkoa wa Iringa wa wakati huo Michael Kamuhanda alikuwemo.

Hata hivyo, amekiri mbele ya mahakama kwa vitendo kuieleza mahaka kwa kutumia silaha hiyo iliyofikishwa mahakamani hapo kwa ajili ya ushahidi kuwa silaha hiyo isingeweza kujifyatua kwa kuwa ufyatukaji wake ni wa hatua (process).

Kutokana na shahidi namba tano ambaye kuwa na hudhuru ya kuuguliwa waaendesha mashtaka waliiomba mahakama shauri hilo liahirishwe hadi pale litakapopangiwa tarehe nyingine katika kikao kitakachofuata na kwamba kielelezo namba 5 na namba 5 vikabidhiwe kwa jeshi la polisi kwa ajili ya kutunzwa hadi pale vitakapohitajika tena kwa ajili ya ushahidi.

Jaji ameahirisha shauri hilo hadi pale litakapopangiwa tarehe na msajili wa mahakama katika kikao kijacho na mtuhumiwa amerudishwa rumande.

Pasificus Cleophace Simon mwenye namba G 2573 anatuhumiwa kwa kumuua mwandishi wa habari Daud Mwangosi Septemba 2, 2012 katika ufunguzi wa matawi ya Chama cha Demokrasia na Maendeleo (Chadema) katika kijiji cha Nyololo wilayani Mufindi katika Mkoa wa Iringa.