WANASIASA NA WAFANYABIASHARA WAHUSISHWA NA MAUAJI YA ALBINO NCHINI TANZANIA

TATIZO la mauaji ya watu wenye ulemavu wa ngozi Albino linalozidi kushika kasi nchini Tanzania linaelezwa kuwa linatokana na watu wenye uchu wa madaraka na mali ambao wamekosa maadili na hofu ya Mungu huku wanasiasa wakihusishwa na jambo hilo.

Wakizungumza kwa nyakati tofauti na mtandao huu, wananchi wanaoneshwa kusikitishwa na vitendo hivyo huku wakiitupia lawama serikali kuwa inaonesha uzembe wa makusudi kulichukulia uzito suala hilo.

Sisto Khani mkazi wa Iringa mjini ameuambia mtandao huu kuwa, serikali imeonesha udhaifu katika suala hili kutokana na kutowachukulia hatua kali watuhumiwa wanaokamatwa kwa vitendo hivyo na kwamba kama serikali itaendelea kuonesha udhaifu wa namna hiyo, vitendo hivyo haviwezi kuisha.

Hata hivyo Sisto alisema pamoja na serikali kuonesha udhaifu katika suala hilo, ushirikina ndio chanzo kikubwa cha vitendo hivyo kutokana na watu kuamini kuwa kwa kutumia viungo vya watu hao unaweza kupata utajiri au kutimiza matakwa yao.

“Ushirikina na chanzo cha mauaji ya albino kwa sababu kuna watu wanatumia njia hiyo eti wanataka vyeo, utajiri, mali na uongozi” amesema.

Amesema kuwa wanasiasa ndio watuhumiwa wakubwa kutokana na vitendo hivyo kufanyika zaidi wakati wa chaguzi.

“Mauaji mengi ya albino yanatokea zaidi unapokaribia uchaguzi. Tunakumbuka mauaji haya yalitokea sana mwaka 2010 lakini angalia mwaka huu wa uchaguzi mauaji yameibuka upya. Ni dhahiri wazi kuwa hawa wanasiasa hawa wanafanya hivyo wakiamini kuwa hawawezi kutoka madarakani.

“Serikali haijatenda haki hata kidogo kwa sababu hatujaona watuhumiwa wakihukumiwa au wakinyongwa licha ya kuwa tunasikia tu kuwa wamekamatwa. Wangenyongwa nadhani lingekuwa fundisho kwa wengine lakini kwa sababu tatizo ni wale wanaojulikana ndiyo maana serikali haifanyi hivyo” amesema.

Kwa upande wake Asha Hingi mkazi wa mtaa wa Kinyanambo “A” Mafinga, akiongea na mtandao huu nyumbani kwake amesema licha ya kuwa Mafinga haina albino wengi, vitendo wanavyotendewa ni vya kishetani ambavyo vinatakiwa kutofumbiwa macho na mtu yeyote.

Amesema kuwa jamii inapaswa kulitambua hili na kufanya ulinzi wa hali ya juu kuwabaini wauaji hao na kuwashughulikia ipasavyo kwani vitendo wanavyofanya si vya kiungwana.

“Vitendo hivi ni vya kusikitisha sana tena ni aibu kwa taifa letu kusifika kwa mauaji ya wenzetu! Kila mtu anapaswa kuwatambua hawa albino kuwa ni watu kama tulivyo wengine na wanapaswa kupata haki zote ambazo sisi tunazipata na tunazihitaji.

“Pia jamii inapaswa kuhakikisha inawajibika kwa dhati katika kuhakikisha usalama wa watu hawa. Kwa nini hawa wenzetu waishi kama wakimbizi? Jaamani watanzania tuwe na huruma kwa wenzetu hawa".

Ameitaka jamii kutokupuuza suala na kutaka kula mtu kulichukulia uzito kama nake kwa kuwa kuzaa albino kunaweza kumpata mtu yeyote wakati wowote bila yeye kutarajia.

Pamoja na kuvihusisha vitendo hivyo na masuala ya ushirikina, ameitaka jamii pale anapozaliwa albino katika familia kuliweka wazi jambo  hilo ili jamii ijue na kusaidia ulinzi badala ya kuficha na kuhatarisha maisha ya familia.

Kalinga Mawazo mkazi wa Mafinga, naye anawashutumu vikali wafanyabiashara na wanasiasa kuwa wao ndicho chanzo kikubwa cha mauaji ya albino akiwahusisha kushiriki vitendo vya kishirikina.

“Hatujajua kama kweli ni siasa lakini wanasiasa na wafanyabiashara wanaweza kuwa chanzo kikubwa kwa sababu ya masharti yao ya ushirikina wakiamini kuwa wataendelea kibiashara na na wanasiasa kuamini kuwa hawatapoteza nafasi zao za uongozi kitu ambacho waganga wanaowatumia wanawadanganya” amesema.

Mtandao huu umefanikiwa kupiga hodi kwa mzee mmoja anayeaminika kuwa ni mganga wa jadi ambapo lilifanikiwa kufanya mahojianao kwa masherti ya kutotaka jina liandikwe.

Akitoa maelezo kwa masharti hayo, alikiri kuwapo kwa vitendo hivyo na kwamba ni kweli wapo baadhi ya watu wanaojiita waganga kutaka viungo vya watu kama hao kwa madai kuwa ni mazindiko huku wakidanganya watu.

“Ni kweli vitendo hivi vipo sana na vinanisikitisha sana. Kuna baadhi ya watu wanajiita waganga wanadanganya watu kuwa wanawazindika na kuwataka wakalete vitu kama hivyo lakini watu wenyewe bila kufikiria wanakwenda kuwaua wenzao bila huruma.

“Hata mimi ninachojiuliza ni kwamba, ina maana hawa wanaojiita waganga wenye tabia hizo, wakizaliwa albino katika familia zao watawaua? Nawaomba watu wasikubali kudanganywa na watu kama hao kwa sababu ni uongo mkubwa. Halafu naiomba serikali kuwanyonga watu wanaojifanya waganga wa mtindo huo kwa sababu wanatudhalilisha sisi wengine” kimesema chanzo chetu.

Hata hivyo chanzo hicho kilipotakiwa kuwataja watu hao wanaosadikiwa waganga wanaojihusisha na vitendo hivyo kwa kuwadanganya watu, kilisema hakina majina.

“Sina majina ya watu kama hao ila naamini kuwa vitendo hivi vipo na vinafanyika na baadhi ya watu wanaotumia jina la uganga kwa ajili ya kutafuta pesa japo kuwa hata mimi sijawafahamu kwa sababu kwenye maeneo yetu hakuna matukio ya kikatili kama hayo” kimesema chanzo chetu.

Mwaka 2010 serikali ililazimika kuwataka wananchi kupiga kura kubaini wanaojihusisha na vitendo vya mauaji ya albino na ujambazi jambo lililofanyika japo kuwa majibu ya kura hizo hayakutolewa hadi leo.