WAHUDUMU WA AFYA WAFANYA KAZI GIZANI KIJIJINI

Zahanati ya kijiji cha Rungemba

WAHUDUMU wa afya katika zahanati ya Rungemba Kata ya Rungemba Wilaya ya Mufindi katika Mkoa wa Iringa wanafanya kazi katika mazingira magumu na hatarishi nyakati za usiku kwa sababu ya kukosa mwanga.

Hayo yamebainishwa na muuguzi katika zahanati hiyo Suzan Mhongole alipokuwa akiongea na gazeti hili jana juu ya ugumu wa kazi yao nyakati za usiku.

Mhongole amesema wanalazimika kutumia kurunzi nyakati za usiku hasa pale anapofika mama mjamzito mwenye uchungu wa kujifungua au mgonjwa anayehitaji huduma ya haraka.

“Tulikuwa na mwanga unaotokana na jua (solar power) lakini zimeharibika na hatujui tatizo ni nini kwani hata wakija mafundi hawatuelezi tatizo ili ufanyike utaratibu wa kutatua tatizo hilo.

“Kijiji kilileta mafundi lakini hawakutueleza tatizo ni nini. Tunafanya kazi katika mazingira ya hatari sana kwani ni hatari hata kwa mama na mtoto pale anapojifungua au mgonjwa ambaye anahitaji huduma ya haraka” amesema Mhongole.

Ameeleza kuwa shida yao kubwa katika sehemu yao ya kazi ni mwanga kwani hawawezi kufanya kazi vizuri nay a kuridhisha kama hawana mwanga na kuiomba serikali kuwafikiria katika hilo.

                                                                                                                                 

“Tumewaambia wananchi kuwa wajitahidi pale wanapopata tatizo wanapokuja kwenye matibabu wafike na taa lakini wakati mwingine inakuwa ni dharura mno wanasahau kwa hiyo inatulazimu kuanza kutafuta betri za kurunzi usiku huku mgonjwa akikosa huduma hadi pale zinapopatikana betri. Mazingira kwa ujumla mi magumu” alisema.

Hata hivyo utafiti uliofanyika na gazeti hili katika kijiji hicho umebaini kuwapo kwa uhaba wa mafuta ya taa ambapo ni chanzo cha wagonjwa kutofika na taa kwenye zahanati pale wanapohitaji huduma nyakati za usiku.