Polisi wadaiwa kuua raia mmoja huku wawili wakijeruhiwa

NA MWANDISHI WETU, NJOMBE.

RAIA mmoja mkazi wa Njombe mjini ameuawa kwa risasi na Polisi kitendo kilichowatia hasira wananchi na kufunga mitaa kwa maandamano mkoani Njombe kwa kutaka kujua sababu zilizowafanya Polisi kufyatua risasi kwa wananchi na kusababisha kifo cha mwanachi huyo.

Kutokana na tukio hilo wananchi waliamua kufanya maandamano leo kutaka kujua sababu za mwezao kuuawa jambo lililosababisha jeshi la polisi kutumia mabomu na silaha za moto hapo na kujeruhi raia wengine wawili katika maandamano hayo.

Hasira za wananchi hao zimesababisha shughuli kusimama kwa siku nzima huku maduka yakifungwa pamoja na usafiri kuwa mgumu kutokana na wananchi kutaka kupata majibu ya kuuawa kwa  raia huyo.

Wakizungumza na mtandao huu, wananchi wakazi wa Njombe wamesema Polisi walifika kilabuni walikokuwa wakinywa pombe wananchi na kufyatua risasi bila sababu yoyote kisha kumpiga mwananchi huyo aliyefariki dunia papo hapo.

Mmoja wa mashuhuda wa tukio hilo Amos Nziku ameeleza kuwa, ilikuwa majira ya jioni jana walipokuwa wakipata vinywaji katika kilabu kimoja cha pombe ambapo alitokea raia mmoja akaingia kilabuni hapo akikimbia jambo lililowashtusha na kumtaka kueleza sababu ya kuingia akiwa anakimbia.

“Jana tulikuwa kilabu cha Nyondo tukipata kiburudisho chetu cha koo huku tukiongea na marafiki gafla akaingia mtu akikimbia tukashtuaka sana. Sasa kule kushtuka kila mtu akataka kujua anakimbia nini, yule jamaa akatuambia polisi wanamfukuza.

“Tulitoka watu wote pale kilabuni kuangalia tukawaona kweli polisi tukaanza kuwapigia kelele kutaka kujua ni kwa nini wanamfukuza. Lengo ni kujua kama ni mwizi ili tumshughulikie lakini cha kushangaza, polisi wakaanza kufyatua risasi kuelekeza kwetu. Kwa bahati mbaya risasi ilimfikia mwenzetu mmoja akafariki papo hapo” amesema Nziku.

Hata hivyo Emelia Sanga ameliambia mtandao huu kuwa imekuwa ni kawaida kwa polisi wa Njombe kutaka hela kwa nguvu kutoka kwa wananchi na kwamba inaonesha kumfukuza raia huyo hadi kukimbia kilabuni walikuwa wakimtaka hela.

“Njombe polisi wanatutesa na kama ndivyo wanavyofundishwa huko wanakojifunza upolisi basi nchi hii wataishi wenyewe. Wamekuwa wakisumbua watu kwa kuwataka hela kwa nguvu. Inaonesha hata huyu waliyekuwa wanamfukuza walikuwa wanataka hela akawa anakimbia. Maana hawa jamaa ukiona umesimama tu unalo! Na hivi alikuwa na gari wangemuandikia kosa lolote hata kama hana kosa.

“Kweli nasikitika sana kwa sababu zamani enzi za Mwalimu tukiwaona polisi tulikuwa na amani lakini kwa siku hizi tukiwaona hawa jamaa ni afadhali tuwaone simba. Hawa jamaa wamekuwa ni zaidi ya wanyama tena wakionekana sehemu tunawakimbia kabisa” amesema Sanga.

Akizungumza na mtandao huu kwa masharti ya kutotaka jina lake liandikwe kwa kuwa yeye si msemaji, mmoja wa jeshi la polisi Mkoa wa Njombe amesema kuwa wakati wakifanya doria waliliona gari ambalo walilitilia mashaka na kuanza kulifuatilia ambapo mwenye gari baada ya kugundua kuwa tunamfuatilia alikwenda kuingia kilabuni na kuwatoa wananchi wakiwa na hasira wakaanza kutupigia kelele na kuturushia mawe lakini katika kujihami tukatumia silaha za moto.

“Jana tulikuwa doria na gari la kiraia lakini tukiwa katika shughuli hiyo tukaliona gari kwenye kituo cha mafuta gari ambalo tulilitilia shaka tukasimama ili kuona linaelekea wapi. Baada ya kuondoka pale kwenye kituo cha mafuta badala ya kuingia katika barabara kubwa likaingia barabara za uchochoroni ndipo tulipoanza kulifuatilia linakokwenda.

“Inaonekana Yule dereva alitugundua halafu akafika katika kilabu kimoja kinaitwa Nyondo akasimamisha gari lake halafu akatoka mbio akakimbilia mule ndani. Baada ya kuingia dakika chache tu tukaona wengi wanatoka wakiwa na hasira huku wakiturushia mawe na kupiga mayowe. Katika kujihami tukaanza kufyatua risasi hewani ili watawanyike kisha tukaondoka lakini kwamba tumeua hilo mimi sijui kama kweli tumemua sisi” kimesema chanzo chetu.

Hata hivyo chanzo hicho kilipotakiwa kueleza kuwa walikuwa na shaka gani juu ya gari hilo kimesema ni kiintelijensia zaidi na kwamba haiwezekani kusema kwa kuwa ni za kiusalama na ni shughuli za kipolisi.

Mtandao huu ulipomtafuta kamanda wa Polisi Mkoa wa Njombe Franco Kibona ili kutolea ufafanuzi juu ya suala hilo alisema hawezi kuzungumza chochote kwa kuwa yupo kwenye kikao na kwamba hali ya usalama haijakaa vizuri.