Zitto: Viongozi wa vyama wasiwe viongozi wa serikali. > Wananchi wamwita msaliti

Kiongozi Mkuu wa ACT Wazalendo Zitto Kambwe akiwahutubia wakazi wa Manispaa ya Iringa

KIONGOZI Mkuu wa Chama cha ACT Wazalendo Zitto Kabwe amesema Chamani cha Mapinduzi kinashindwa kutofautisha uongozi wa chama na uongozi wa serikali na kusababisha kuwafanya wananchi kushindwa kujua utendaji wa viongozi hao.

Zitto ameyasema hayo alipokuwa akiwahutubia wakazi wa Manispaa ya Iringa katika Mkutano wa chama hicho uliofanyika katika viwanja vya Mwembetogwa.

Amesema si rahisi kujua utendaji wa kazi za chama na kazi sa serikali kwa Rais Jakaya Kikwete kutokana na kuwa na kofia mbili za uenyekiti wa chama taifa na kofia ya urai wan chi na kwamba haijulikani ni wakati gani anafanya kazi za chama na ni wakati gani anafanya kazi cha taifa.

Amesema nchi inakosa mwelekeo kutokana na kuwapo kwa mfumo wa uongozi wa kinyonyaji na dhuruma unaotokana na viongozi wasiokuwa na maadili ambao kazi yao ni kufanya unyonyaji badala ya kufanya kazi za taifa.

“Ifike mahali ikaeleweka na kutofautisha viongozi wa chama na viongozi wa serikali ili utendaji uweze kueleweka. Si rahisi kutambua Rais Kikwete ni wakati gani anafanya kazi za chama na ni wakati gani anafanya kazi za taifa.

“Mfumo wa uongozi wa namna hii ni wa kinyonyaji kwa kuwa viongozi wengi wanafanya kazi za kinyonyaji kwa kuwa hakuna wa kumkemea mwenzake. Ndiyo maana hata mafisadi wanatazamwa usoni tu kwa sababu mfumo wa uongozi ndivyo ulivyo” amesema.

Amesema mtu yeyote akisema yeye ni kiongozi lazima awe mpambanaji kupigania haki za watu wake kwa ajili ya kuhakikisha watu wake wanakuwa na maendeleo.

Amesema umasikini wa watanzania unasababishwa na wabunge wasiopamba kupigania haki za watu wao na kugeuka kuwa wanyonyaji wasio na huruma.

Amewataka watanzania kuwa kuelewa kuwa si kwamba ufisadi unakwisha bali unaendelea kwa kasi zaidi kwa kuwa serikali iliyopo madarakani imekosa meno kuwashughulikia wezi sugu wanaoiba mali ya umma na kwamba umasikini ni chaguo la viongozi wa kisiasa.

“Umasikini wa Tanzania ni chaguo la viongozi wa kisiasa. Tusipofanya mabadiliko sisi wananchi, umasikini huu utaendelea kuwapo na hautakoma kwa kuwa wenzetu wa chama tawala ndio chaguo lao” amesema.

Amesema tatizo kubwa uchumi umeshikiliwa na watu wachahe ambao hao hao ni viongozia wa kisiasa na wengine ni viongozi wa serikali na kwamba uchumi wa Iringa pia umeshikiliwa na watu wa namna hiyo.

Pia amewataka wananchi kutokubali kukodishiwa ardhi na wawekezaji kwa kuwa ardhi ni mali ya watanzania kwa matumizi ya maendeleo ya watanzania na taifa lao.

Katika hatua nyingine Zitto ameshangazwa na kitendo cha watuhumiwa wa wizi wa fedha za Tegeza Escrow kupewa ujenzi wa bandari ya Mwambani jijini Tanga bila kuwapo kwa tangazo la zabuni ya ujenzi wa bandari hiyo.

“Tunamtaka Waziri wa uchukuzi Samwel Sitta afanye uchunguzi wa ujenzi wa bandari ya Mwambani kule Tanga na aueleze umma zabuni ya ujenzi huo ilitangazwa lini! Cha kushangaza zaidi waliopewa kazi ya ujenzi wa bandari hiyo ni wale watuhumiwa wa wizi wa fedha za Escrow. Hili la kuwapatia mafisadi wa Escrow ujenzi wa bandari halikubaliki hata kidogo” amesema.

Amesema watanzania watambue kuwa vitendo vyote vinavyofanyika nchini na kuwaumiza wananchi vinatokana na viongozi kukosa miiko ya uongozi ambayo ipo wazi katika Azimio la Arusha.

“Labda niwakumbushwe watanzania mnaolijua Azimio la Arusha na niwaambie msiolijua Azimio hili kuwa, katika Azimio la Arusha kuna mambo makubwa manne ambayo ni msingi wa Azimio zima. Jambo la kwanza ni Siasa ya Ukombozi, jambo la pili ni Siasa ya Kujitegemea, Jambo la tatu ni Madhumuni ya TANU na jambo la nne ni Miiko ya Uongozi.

“Haya yote hawa viongozi wenzetu wameyatupilia mbali na ndiyo maana kumekithiri kwa vitendo vya kifisadi kwa sababu hawana maadili hawa wanaojiita viongozi. Ni lazima turudi kwenye misingi ya nchi hii, ni lazima kila Mtanzania awe katika uchumi wa nchi hii” amesema.

Pia amesema, ili kurejesha miiko ya uongozi na misingi ya taifa hili ni lazima viongozi kuweka wazi mali walizo nazo ili wananchi waweze kujua na kuzitambua badala ya kuficha na kuendelea kuiba na kujilimbikizia.

Hata hivyo Zitto amemtaka Rais Kikwete kuunda bunge maalumu la Katiba ili lifanye mapitio ya rasimu ya Tume ya Katiba iliyoandaliwa na Jaji Warioba ili maoni ya wananchi yasipuuzwe kama ilivyofanyika Dodoma wakati wa Bunge maalumu lililoiweka pembeni rasimu ya hiyo na kutengeneza maoni yao.

Hata hivyo Zitto amesema watanzania wanapaswa kumpima kwa matendo yake badala ya kumpima kwa maneno ili mwisho wa kipimo hicho waweze kupata majibu sahihi.

“Ninajua kuwa kuna propaganda nyingi tu ila kwa kuwa mimi ni mwanasiasa hazinisumbui. Ukiwa mwanasiasa lazima uwe na ngozi ngumu. Ninachowaomba wananchi, nipimeni kwa matendo yangu, msinipime kwa maneno ya wapinzani wangu, kaeni mtupime, wekeni wabunge wote mtapata majibu ni nani mnyonge mwenzenu, ni nani anayewatetea, ni nani mnayetaka kumtetea na ni nani mnatembea pamoja” amesema.

Wakati Zitto akiomba wananchi wampime kwa matendo yake, wananchi wamekuwa na maswali kuwa ni matendo gani anayasema ikiwa inajulikana kuwa yeye ni msaliti na akionesha kuwa na uchu wa madaraka.

Kwa nyakati tofauti wananchi wamesikika wakijadili vijiweni kuwa hawaoni matendo ya kumpima Zitto zaidi ya tendo la usaliti alilolifanya na kuhoji kuwa ikiwa ni uzalendo anaotaka kuufanya ni kwa nini hakutaka kuufanya akiwa ndani ya chama alichokisaliti.

Pascal Madafu mkazi wa Kihesa ni miongoni mwa wananchi wanaomshangaa Zitto kwa kutaka apimwe kwa matendo yake yepi!

“Hivi Zitto anayemdanganya ni nani? Tunachokijua hadi sasa ni kwamba yeye ni msaliti sasa nimeshangaa anaposema tumpime kwa matendo yake. Ni matendo gani anayotaka tumpime? Matendo ya usaliti au ni nini hasa?

“Kingine ambacho tunaelewa ni kwamba yeye alishaonekana mapema kuwa ana uchu wa madaraka. Hapa anatafuta umaarufu tu lakini hakula lolote. Asije akawa kipandikizi kwa ajili ya kuvuruga nguvu ya upinzani kama ilivyofanyika mwaka 1995. Tunayakumbuka sana na lazima tuwe makini na watu kama hawa. Ni mapema mno kusema Zitto anafaa kwa sababu tusije tukajiloga wenyewe” anasema Madafu.

Nziku Samsoni amesema kipimo cha Zitto kilishafanyika muda mrefu na ukweli ulishapatika mahakamani alikokuwa amekimbilia kuweka kinga.

Amesema kuendelea kumsikiliza na kumwamini mtu anayeonekana wazi kuwa ni msaliti ni sawa na kutwanga pilipili huku mshahara wake ukiwa ni kukohoa.

“Sioni haja ya kupoteza muda kumsikiliza msaliti na mroho wa madaraka. Baada ya kuona hapati uenyekiti katika Chama cha Demokrasia na Maendeleo (Chadema) akakisaliti chama na hatimaye amepata alichokuwa anakitaka sasa ameanza kutupumbaza ili aonekane yeye ni kiongozi makini! Muongo mkubwa kabisa. Cha msingi watanzania tunatakiwa na msimamo tusiyumbishwe na wanasiasa kama hawa” amesema.

Pia wamesema muda uliopo ni wa kujipanga kwa ajili ya kuwaadhibu viongozi wanafiki, wazembe na viongozi wezi hususani wabunge ambao hawakufanya kazi walizotumwa na wananchi na badala yake wakasimamia maslahi yao bnafsi ili kwa adhabu watakayoipata wajifunze kwa siku nyingine kuwa wananchi wamechoka na viongozi wasio na msaada.