TAKUKURU wataka wananchi wasikubali kuhongwa

TAASISI ya kupambana na rushwa (TAKUKURU) Mkoa wa iringa wamewataka wananchi kutokubali kuhongwa na wagombea wa uombozo katika kipindi hiki tunapoelekea katika kipindi cha uchaguzi unaotarajiwa kufanyika mwishoni mwa mwaka huu.

Haya yamezungumzwa na ofisa wa TAKUKURU elimu kwa umma Iringa Anneth Mwakatobe alipokuwa akiongea na mtandao huu ofisini kwake.

Mwakatobe amewataka wananchi kutambua viashiria vya rushwa wakati huu kuwa ni pamoja na mgombea au mwanasiasa kutoa kitu kama khanga na vitenge kwa ajili ya kutaka kuchaguliwa ama kushawishi wananchi kumchagua mtu fualani.

“Mgombea akiwa nakusanya baadhi ya watu halafu anakutana nao kwa siri watu wengine kujua aidha kwa kutaka kuongea nao labda kutoa ahadi kwa watu, ahadi ambazo zinawashawishi watu kumchagua au kuwapa watu fedha ili wamchague ni rushwa.

“Pia mgombea ambaye hajiamini yaani mgombea ambaye hana maslahi ya taifa, mgombea ambaye hana sera lakini haoneshi kama ana nia ya dhati yaani anashawishi zaidi, huyo naye tunaweza kusema ana viashiria vya rushwa” amesema Mwakatobe.

Amesema kipindi hiki ni kipindi cha wananchi kuwa watulivu na kuwachunguza wanansiasa kwa umakini ili pale utakapofika muda wa kuja kwao kuomba kuchaguliwa wawe na majibu sahihi.

Ameongeza kuwa viongozi wanaotumia njia ya kuwarubuni wapiga kura kwa kuwahonga kitu chochote si wazalendo kwa kuwa njia wanayoitumia si halali na kwamba wananchi wawakatae watu wa namna hiyo ikiwa ni pamoja na kutoa taarifa kwa TAKUKURU ili wakamatwe.

Hata hivyo amesema TAKUKURU hawatachoka kutoa elimu kwa umma ili jamii iweze kutoa ushirikiano kupambana na vitendo vya rushwa ambavyo vimekuwa vikiumiza wananchi.

“Moja ya kazi yetu ni kutoa elimu kwa umma hasa wapiga kura katika kipindi kama hiki tunapoelekea kwenye uchaguzi ili tuweze kupata viongozi waaminifu, waadilifu na viongozi wazalendo.

“Tunawaomba wananchi kuwa makini kwani elimu hii tunatumia njia mbalimbali kama vile semina, mikutano ya hadhara, vipindi vya redio ikitokea na pia kufanya mijadala ya wazi kwa wananchi mbalimbali na wadau ambapo kikubwa zaidi ni kutafut au kupata viongozi wa waadilifu katika kipindi cha uchaguzi” amesema.

Amefafanua kuwa viongozi waadilifu ni wale ambao wapo tayari kupambana na rushwa, ambao pia wako tayari kuleta maendeleo kwenye jamii wanayoiongoza.

“Tunaaomba wananchi wasijihusishe kabisa na vitendo vya rushwa wakati wa uchaguzi na pia watanzania wawe wazalendo yaani wawe wachungu na nchi yao.

“Watanzania wawe wajasiri, wasiwaogope TAKUKURU, wasiwaogope viongozi wenye vitisho na wawe jasiri kutoa taarifa za viongozi wanaojihusisha na vitendo vya rushwa na pia watanzania wajifunze kuichukia rushwa” amesema.